Drita ka mposhtur Feronikelin, ndërsa Ballkani ka fituar ndaj Suharekës.

Superliga e Kosovës ka përfunduar sot stinorin vjeshtor me xhiron e tetëmbëdhjetë.

Në Gjilan, Feronikeli e ka filluar ndeshjen mirë duke kaluar në epërsi në minutën e njëmbëdhjetë me golin e Zekollit. Megjithatë, Drita ka reaguar në pjesën e dytë. Broja ka barazuar rezultatin në minutën e pesëdhjetë e pestë, ndërsa në minutën e dytë të kohës shtesë, Manaj ka shënuar golin e fitores për ekipin gjilanas.

Me këtë fitore, Drita arrin në kuotën e dyzet pikëve dhe përfundon stinorin vjeshtor në pozitën e parë.

Ndërkohë, në Suharekë është zhvilluar derbi lokal mes Suharekës dhe Ballkanit. Skuadra e drejtuar nga Orges Shehi ka arritur fitore të pastër 2-0. Emerllahu ka shënuar golin e parë në minutën e pesëmbëdhjetë, ndërsa Tolaj ka vulosur rezultatin në minutën e gjashtëdhjetë e nëntë. Kjo fitore e mban Ballkanin në vendin e dytë me tridhjetë e tri pikë.